ప్రకాశ్ రాజ్కు అదిరిపోయే కౌంటర్ ఇచ్చిన హేమ... వీడియో ఇదిగో!
- పవన్ కల్యాణ్ను ఉద్దేశించి ప్రకాశ్ రాజ్ వ్యంగ్యాస్త్రాలు
- 'దొర' అంటూ పోస్ట్ చేయడంపై ఆగ్రహం
- ప్రకాశ్ రాజ్కు స్ట్రాంగ్ కౌంటర్ ఇచ్చిన నటి హేమ
- వ్యక్తిత్వ హననానికి పాల్పడవద్దని హితవు
- రాజకీయ విమర్శలు చేయడంలో తప్పులేదన్న హేమ
తెలంగాణలో జనసేన పార్టీ పోటీ చేస్తుందని పవన్ కల్యాణ్ ఇటీవల ప్రకటించిన నేపథ్యంలో, ప్రకాశ్ రాజ్ 'ఎక్స్' వేదికగా స్పందించారు. "రండి దొర... మీరొస్తానంటే మేమొద్దంటామా?" అంటూ వ్యంగాస్త్రాలు సంధించడంతో పాటు, పవన్ ఒంటరిగా వస్తారా లేక పొత్తుతో వస్తారా అని ప్రశ్నించారు. ఈ పోస్టులో పవన్ పేరును నేరుగా ప్రస్తావించకపోయినా, సందర్భాన్ని బట్టి అది ఆయనను ఉద్దేశించినదేనని స్పష్టమవుతోంది. ముఖ్యంగా 'దొర' అనే పదాన్ని వాడటంపై విమర్శలు వెల్లువెత్తాయి.
ఈ పరిణామాలపై హేమ స్పందిస్తూ, "పవన్ కల్యాణ్ వ్యక్తిత్వం ఏమిటో ప్రజలందరికీ తెలుసు. కోట్లాది మంది ఆయనను ఆరాధిస్తున్నారు. రాజకీయ విధానాలపై విమర్శలు చేయండి కానీ, వ్యక్తిగత ప్రతిష్ఠను దెబ్బతీసే ప్రయత్నాలు చేయవద్దు. గతంలో ఇలాంటి విమర్శలు చేసిన వారి గతి ఏమైందో చరిత్ర చూసి తెలుసుకోండి" అని పేర్కొన్నారు. ప్రకాశ్ రాజ్ చేసిన పోస్టు తనను తీవ్రంగా కలచివేసిందని ఆమె ఆవేదన వ్యక్తం చేశారు.
పవన్ కల్యాణ్ను 'దొర' అని సంబోధించడంలో ఉన్న వెటకారం స్పష్టంగా కనిపిస్తోందని, తెలంగాణ ప్రాంతంలో ఈ పదాన్ని ఏ ఉద్దేశంతో ఉపయోగిస్తారో ప్రకాశ్ రాజ్కు కూడా తెలుసని హేమ అభిప్రాయపడ్డారు. కూటమి ప్రభుత్వం విధానాలను లేదా జనసేన పార్టీ రాజకీయ నిర్ణయాలను విమర్శించే హక్కు ఎవరికైనా ఉంటుందని, అయితే వ్యక్తిత్వ హననానికి పాల్పడటం మానుకోవాలని ఆమె సూచించారు.
