నెల రోజులు షుగర్‌ మానేస్తే ఎంత బరువు తగ్గుతారో తెలుసా?

నెల పాటు చక్కెరను పూర్తిగా పక్కన పెడితే శరీరంలో ఎలాంటి మార్పులు వస్తాయో తెలుసా? బరువు తగ్గడం దగ్గరి నుంచి చర్మం మెరిసిపోవడం వరకు ఎన్నో ప్రయోజనాలు ఉంటాయంటూ సోషల్ మీడియాలో తెగ ప్రచారం జరుగుతోంది. మరి ఇందులో నిజమెంత? వైద్య నిపుణులు ఏం చెబుతున్నారో చూద్దాం..!

నిజానికి మనం రోజూ తినే స్వీట్లు, కూల్ డ్రింక్స్, ప్యాక్ చేసిన స్నాక్స్‌లో ఉండే చక్కెరను తగ్గించడం వల్ల బరువు తగ్గడం ఖాయం. కానీ నెలలో ఎంత బరువు తగ్గుతామనేది కేవలం చక్కెర మానడం పైనే కాదు.. మన జీవక్రియ, శారీరక శ్రమ, నిద్ర, తీసుకునే క్యాలరీలపై ఆధారపడి ఉంటుంది.

శరీరంలో జరిగే మార్పులివే..

బరువులో మార్పు
చక్కెరను, రిఫైన్డ్ కార్బోహైడ్రేట్లను తగ్గించినప్పుడు శరీరంలో గ్లైకోజెన్ నిల్వలు తగ్గుతాయి. గ్లైకోజెన్ తనతో పాటు నీటిని పట్టి ఉంచుతుంది. కాబట్టి చక్కెర మానేసిన మొదటి కొన్ని రోజుల్లోనే శరీరం ఉబ్బరంగా అనిపించడం తగ్గుతుంది. ముఖం, ఒంటిపై పొంగు తగ్గినట్లు అనిపిస్తుంది. అయితే ఇది కేవలం నీటి బరువు తగ్గడం వల్ల జరిగేదే కానీ కొవ్వు కరగడం వల్ల కాదు. రోజువారీ కేలరీల వినియోగం తగ్గినప్పుడు మాత్రమే క్రమంగా కొవ్వు కరిగి నిజమైన బరువు తగ్గుతారు.

క్రేవింగ్స్ తగ్గుతాయి
చక్కెర ఎక్కువగా ఉండే ఆహారాలు మెదడులోని ‘రివార్డ్ పాత్‌వేస్‌’ను ప్రేరేపిస్తాయి. అందుకే తీపి తినాలనిపించే కోరిక ఎక్కువగా ఉంటుంది. చక్కెర మానేసిన మొదటి కొన్ని రోజులు చాలా ఇబ్బందిగా అనిపించినా క్రమంగా ఆ కోరికలు తగ్గుముఖం పడతాయి. దీనివల్ల ఆకలి నియంత్రణలోకి వస్తుంది. అనవసరమైన స్నాక్స్ తినడం తగ్గుతుంది.

రోజంతా స్థిరమైన శక్తి
తీపి పదార్థాలు తిన్నప్పుడు రక్తంలో చక్కెర స్థాయులు ఒక్కసారిగా పెరిగి, అంతే వేగంగా పడిపోతాయి. దీనివల్ల తిన్న కాసేపటికే మళ్లీ నీరసం, అలసట వస్తాయి. చక్కెరను దూరం పెడితే రక్తంలో గ్లూకోజ్ స్థాయులు స్థిరంగా ఉంటాయి. ఫలితంగా మధ్యాహ్నం భోజనం తర్వాత వచ్చే బద్ధకం తగ్గి, రోజంతా శక్తిమంతంగా, ఏకాగ్రతతో ఉండగలుగుతారు. నిద్ర నాణ్యత కూడా మెరుగుపడుతుంది.

అన్ని చక్కెరలూ ఒకటి కాదు!
కూల్ డ్రింక్స్, ప్యాక్ చేసిన జ్యూస్‌లు, స్వీట్లలో వాడే చక్కెర ఆరోగ్యానికి హానికరం. కానీ పండ్లు, పాల వంటి సహజసిద్ధమైన ఆహారాల్లో ఉండే చక్కెర మంచిది. ముఖ్యంగా పండ్ల ద్వారా వచ్చే చక్కెరతో పాటు శరీరానికి ఫైబర్, విటమిన్లు, యాంటీఆక్సిడెంట్లు అందుతాయి. ఇవి శరీరంలో చక్కెరను నెమ్మదిగా శోషించుకునేలా చేస్తాయి. కాబట్టి పండ్లను పూర్తిగా మానేయాల్సిన అవసరం లేదు.

నిపుణుల సలహా
ఆహారం విషయంలో మరీ కఠినమైన నియమాలు పెట్టుకుంటే ఎక్కువ కాలం పాటించలేరు. చక్కెరను పూర్తిగా ఆపేయాలని ఒత్తిడి తెచ్చుకునే కంటే.. కూల్ డ్రింక్స్ మానేయడం, కాఫీ/టీలలో చక్కెర తగ్గించడం, మైదా వంటి ప్రాసెస్ చేసిన ఆహారాలకు దూరంగా ఉండటం, భోజనంలో ప్రోటీన్, ఫైబర్ పెంచడం వంటి చిన్న చిన్న మార్పులతో ఆరోగ్యకరమైన జీవనశైలిని అలవాటు చేసుకోవడం ఉత్తమం.