తగ్గిన వర్షం... ఎట్టకేలకు ప్రారంభమైన రాజస్థాన్ రాయల్స్, ఆర్సీబీ మ్యాచ్

రాయల్ ఛాలెంజర్స్ బెంగళూరు (ఆర్సీబీ), రాజస్థాన్ రాయల్స్ (ఆర్‌ఆర్) మధ్య మ్యాచ్ ఎట్టకేలకు ప్రారంభమైంది. శుక్రవారం గువహటిలోని బరస్పరా క్రికెట్ స్టేడియంలో జరుగుతున్న ఈ మ్యాచ్‌లో రాజస్థాన్ రాయల్స్ టాస్ గెలిచి బౌలింగ్ ఎంచుకుంది. వర్షం కారణంగా ఈ మ్యాచ్ ఆలస్యంగా ప్రారంభమైంది.

టాస్ గెలిచిన అనంతరం రాజస్థాన్ కెప్టెన్ రియాన్ పరాగ్ మాట్లాడాడు. "మేము ముందుగా బౌలింగ్ చేయబోతున్నాం. ఈ పిచ్ పొడిగా ఉంటుందని భావించాం, కానీ వర్షం పడటంతో కొంత తేమ ఉండే అవకాశం ఉంది. ఈ తేమను సద్వినియోగం చేసుకోవాలనుకుంటున్నాం" అని తెలిపాడు. టోర్నీకి ముందు వేసుకున్న ప్రణాళికల ప్రకారం తమ జట్టు వ్యూహాత్మకంగా ఆడుతోందని, ఓపెనర్లు మంచి ఫామ్‌లో ఉన్నంత వరకు తనకు వ్యక్తిగతంగా తక్కువ పని ఉన్నా సంతోషమేనని పరాగ్ వ్యాఖ్యానించాడు. ఈ మ్యాచ్ కోసం తుషార్ దేశ్‌పాండే స్థానంలో బ్రిజేష్ శర్మను జట్టులోకి తీసుకున్నట్లు చెప్పాడు.

మరోవైపు ఆర్సీబీ కెప్టెన్ రజత్ పాటిదార్ మాట్లాడుతూ, అభిమానుల మద్దతు తమకు ఇది హోమ్ గ్రౌండ్ అనే భావన కలిగిస్తోందని అన్నాడు. "ఇది మాకు తొలి ఎవే గేమ్. మద్దతు ఇస్తున్న ప్రతి ఒక్కరికీ ధన్యవాదాలు. మీరంతా ఇది మా సొంత మైదానం అనే ఫీలింగ్ కలిగిస్తున్నారు" అని పేర్కొన్నాడు. జాకబ్ డఫీ స్థానంలో అనుభవజ్ఞుడైన జోష్ హేజిల్‌వుడ్‌ను జట్టులోకి తీసుకున్నట్లు ధృవీకరించాడు. "డఫీ గత రెండు మ్యాచ్‌లలో అద్భుతంగా బౌలింగ్ చేశాడు. కానీ, జోష్ అనుభవజ్ఞుడైన ఆటగాడు. అతని రాక జట్టుకు మరింత బలాన్నిస్తుంది" అని పాటిదార్ వివరించాడు.

రాయల్ ఛాలెంజర్స్ బెంగళూరు: విరాట్ కోహ్లీ, ఫిల్ సాల్ట్, దేవదత్ పడిక్కల్, రజత్ పాటిదార్ (కెప్టెన్), జితేష్ శర్మ (వికెట్ కీపర్), టిమ్ డేవిడ్, రొమారియో షెపర్డ్, కృనాల్ పాండ్య, భువనేశ్వర్ కుమార్, అభినందన్ సింగ్, జోష్ హేజిల్‌వుడ్.
ఇంపాక్ట్ సబ్‌స్టిట్యూట్: జాకబ్ బెథెల్, రసిఖ్ సలామ్, సుయాష్ శర్మ, వెంకటేశ్ అయ్యర్, కనిష్క్ చౌహాన్.

రాజస్థాన్ రాయల్స్: యశస్వి జైస్వాల్, ధ్రువ్ జురెల్ (వికెట్ కీపర్), రియాన్ పరాగ్ (కెప్టెన్), షిమ్రాన్ హెట్‌మైర్, డోనోవన్ ఫెరీరా, రవీంద్ర జడేజా, జోఫ్రా ఆర్చర్, నాండ్రే బర్గర్, సందీప్ శర్మ, రవి బిష్ణోయ్, బ్రిజేష్ శర్మ.
ఇంపాక్ట్ సబ్‌స్టిట్యూట్: శుభమ్ దూబే, లువాన్-డ్రే ప్రిటోరియస్, తుషార్ దేశ్‌పాండే, రవి సింగ్, వైభవ్ సూర్యవంశీ.