‘బరి’లోకి మెగా ప్రిన్స్.. ‘కమిటీ కుర్రోళ్లు’ దర్శకుడితో వరుణ్ తేజ్ కొత్త సినిమా

మెగా ప్రిన్స్ వరుణ్ తేజ్ తన కెరీర్‌లో వేగం పెంచి వరుస ప్రాజెక్టులను లైన్‌లో పెడుతున్నారు. ఇటీవల ‘కమిటీ కుర్రోళ్లు’ చిత్రంతో మంచి విజయాన్ని అందుకున్న యువ దర్శకుడు యదు వంశీతో తన కొత్త ప్రాజెక్టును అధికారికంగా ప్రకటించారు. ఈ చిత్రానికి ‘బరి’ అనే ఆసక్తికర టైటిల్‌ను ఖరారు చేస్తూ, వాలీబాల్ ఆట నేపథ్యాన్ని ప్రతిబింబించేలా ఓ పోస్టర్‌ను విడుదల చేశారు.

ఈ సినిమాకు మెగా డాటర్ నిహారిక కొణిదెల నిర్మాతగా వ్యవహరించనుండటం విశేషం. ఆమె తన పింక్ ఎలిఫెంట్ పిక్చర్స్ బ్యానర్‌పై ఈ చిత్రాన్ని నిర్మిస్తున్నారు. సొంత కుటుంబ సభ్యురాలి నిర్మాణంలో వరుణ్ తేజ్ నటించడం ఇదే తొలిసారి కావడంతో ఈ ప్రాజెక్ట్‌పై మెగా అభిమానుల్లో భారీ అంచనాలు నెలకొన్నాయి.

దర్శకుడు యదు వంశీ తన తొలి సినిమా తరహాలోనే ఈ చిత్రాన్ని కూడా పూర్తి గ్రామీణ నేపథ్యంలో తెరకెక్కించనున్నట్లు తెలుస్తోంది. పల్లెటూరి సహజత్వానికి, నేటివిటీకి పెద్దపీట వేస్తూ స్నేహం, కుటుంబ విలువలు, భావోద్వేగాల చుట్టూ ఈ కథ సాగనుందని సమాచారం. విజయవంతమైన యువ దర్శకుడు, విభిన్నమైన కథాంశం, కుటుంబ నిర్మాణ సంస్థ కలవడంతో ఈ సినిమాపై ఇండస్ట్రీలో ఆసక్తికర చర్చ మొదలైంది.