ప్రధాని మోదీతో ఉన్న ఆ బుడతడు ఎవరు?.. వైరల్ ఫొటో వెనుక కథ ఇదే!

ప్రధాని నరేంద్ర మోదీ తన ఇన్‌స్టాగ్రామ్ ఖాతాలో షేర్ చేసిన ఒక ఫొటో సోషల్ మీడియాలో సంచలనంగా మారింది. తన అధికారిక నివాసంలో ఒక చిన్నారితో ఆప్యాయంగా ఉన్న ఫొటోను ఆయన పోస్ట్ చేయడంతో ఆ బాలుడు ఎవరనే దానిపై దేశవ్యాప్తంగా తీవ్ర ఆసక్తి నెలకొంది. "నిన్న 7, లోక్ కల్యాణ్ మార్గ్‌కు వచ్చిన ఒక చిన్న స్నేహితుడితో" అనే క్యాప్షన్‌తో మోదీ ఈ ఫొటోను పంచుకున్నారు. పోస్ట్ చేసిన కొద్ది సమయంలోనే ఈ ఫొటోకు 17 లక్షలకు పైగా లైకులు రావడం విశేషం.

ఈ వైరల్ ఫొటోలో ప్రధాని ఎత్తుకున్న చిన్నారి మరెవరో కాదు, కేరళకు చెందిన ప్రముఖ నటుడు, బీజేపీ నేత కృష్ణకుమార్ మనవడు నీయోమ్ అశ్విన్ కృష్ణ. అతడిని ముద్దుగా "ఓమీ" అని పిలుస్తారు. సోషల్ మీడియా ఇన్‌ఫ్లుయెన్సర్ అయిన దియా కృష్ణ, అశ్విన్ దంపతుల కుమారుడే నీయోమ్. ఇటీవల కృష్ణకుమార్ తన కుటుంబంతో కలిసి ప్రధాని మోదీని కలిసేందుకు ఆయన నివాసానికి వెళ్లారు. ఈ సందర్భంగా తీసిన ఫొటోనే ప్రధాని పంచుకున్నారు.

కృష్ణకుమార్ కుటుంబం సుమారు గంటపాటు ప్రధానితో గడిపింది. ఆయన భార్య సింధు కృష్ణకుమార్, కుమార్తెలు అహానా, దియా, ఇషానీ, హన్సిక, అల్లుడు అశ్విన్ ఈ భేటీలో పాల్గొన్నారు. ఈ భేటీకి సంబంధించిన ఫొటోలు, వీడియోలను కుటుంబ సభ్యులు సోషల్ మీడియాలో షేర్ చేయగా, అవి కూడా వైరల్ అయ్యాయి.

ఈ భేటీ గురించి దియా కృష్ణ ఎంతో భావోద్వేగంతో పోస్ట్ చేశారు. "ఇది మా జీవితంలో అతిపెద్ద అభిమాన క్షణం. మ‌న ప్రియతమ ప్రధాని నరేంద్ర మోదీ గారితో గడిపిన ఈ గంటను మేమెప్పటికీ మరచిపోలేము. నన్ను ఎవరైనా ఈ కల నుంచి మేల్కొల్పండి" అంటూ ప్రధానితో తన కుమారుడు ఉన్న మరికొన్ని ఫొటోలను ఆమె పంచుకున్నారు.

నటి, ఇన్‌ఫ్లుయెన్సర్ అయిన అహానా కృష్ణ కూడా ఈ అనుభవాన్ని పంచుకుంటూ, ఇదొక స్ఫూర్తిదాయకమైన సమావేశం అని అభివర్ణించారు. "ప్రధాని మోదీ వంటి ఉన్నత స్థాయి వ్యక్తి మమ్మల్ని ఎంతో ఆత్మీయతతో, వ్యక్తిగత శ్రద్ధతో పలకరించిన తీరు నన్ను మంత్రముగ్ధురాలిని చేసింది. మేం అడిగిన చిన్న చిన్న ప్రశ్నలకు ఆయన ఓపిగ్గా సమాధానమిచ్చారు. ఆయనతో మాట్లాడుతున్నప్పుడు, ప్రపంచంలోని అత్యంత ప్రభావవంతమైన నాయకులలో ఒకరితో ఉన్నామనే విషయాన్ని మేం దాదాపు మరచిపోయాం" అని ఆమె తన పోస్ట్‌లో పేర్కొన్నారు.