బెంగళూరు కోర్టు కీలక తీర్పు.. 'ఉస్తాద్ భగత్ సింగ్'పై దుష్ప్రచారానికి బ్రేక్

పవర్ స్టార్ పవన్ కల్యాణ్ హీరోగా, హరీశ్‌ శంకర్ దర్శకత్వంలో రూపొందిన 'ఉస్తాద్ భగత్ సింగ్' చిత్రంపై సోషల్ మీడియాలో జరుగుతున్న నెగెటివ్ ప్రచారానికి అడ్డుకట్ట పడింది. ఈ సినిమా గురించి అభ్యంతరకరమైన, కించపరిచే లేదా తప్పుడు సమాచారాన్ని వ్యాప్తి చేయకుండా నిరోధిస్తూ బెంగళూరు సిటీ సివిల్ అండ్ సెషన్స్ కోర్టు కీలక తీర్పును వెలువరించింది. గుర్తుతెలియని వ్యక్తులపై చర్యలు తీసుకునేలా 'జాన్ డో' (John Doe) ఇంజంక్షన్ ఆర్డర్‌ను జారీ చేస్తూ న్యాయమూర్తి జీవనరావు వసంతరావు కులకర్ణి ఆదేశాలిచ్చారు.

చిత్ర నిర్మాణ సంస్థ మైత్రీ మూవీ మేకర్స్ దాఖలు చేసిన పిటిషన్‌పై కోర్టు ఈ మేరకు స్పందించింది. సినిమా విడుదలకు ముందే కొందరు వ్యక్తులు ఉద్దేశపూర్వకంగా నెగెటివ్ ప్రచారం చేస్తూ, బాక్సాఫీస్ వసూళ్లను దెబ్బతీసేందుకు ప్రయత్నిస్తున్నారని మైత్రీ మూవీస్ తమ పిటిషన్‌లో పేర్కొంది. ఈ వాదనలను పరిగణనలోకి తీసుకున్న న్యాయస్థానం, చిత్ర యూనిట్‌కు ఊరటనిస్తూ ఈ మధ్యంతర ఉత్తర్వులు జారీ చేసింది. 

ఈ ఆదేశాల ప్రకారం, ఎక్స్, యూట్యూబ్, ఫేస్‌బుక్ వంటి సోషల్ మీడియా ప్లాట్‌ఫారమ్‌లతో పాటు ఐఎండీబీ, బుక్‌మైషో వంటి వెబ్‌సైట్లలో కూడా సినిమా ప్రతిష్ఠ‌ను దెబ్బతీసే కంటెంట్‌ను ప్రసారం చేయడాన్ని నిషేధించారు. ఈ స్టే ఆర్డర్ తదుపరి విచారణ తేదీ అయిన ఏప్రిల్ 27 వరకు అమలులో ఉంటుందని కోర్టు స్పష్టం చేసింది.

అస‌లేంటీ 'జాన్ డో' ఇంజంక్షన్ ఆర్డర్?
సాధారణంగా ఎవరైనా తప్పు చేస్తే వారి పేరు మీద కేసు వేస్తారు. కానీ, ఇంటర్నెట్‌లో వేలాది మంది అజ్ఞాత యూజర్లు తప్పుడు ప్రచారం చేస్తున్నప్పుడు వారి వివరాలు తెలియవు. అలాంటి సందర్భాల్లో గుర్తుతెలియని వ్యక్తులందరినీ కలిపి ఉద్దేశించి జారీ చేసే ముందస్తు నిషేధాజ్ఞలనే 'జాన్ డో' ఆర్డర్ అంటారు. ఈ ఉత్తర్వుల వల్ల, అభ్యంతరకర పోస్టులను గుర్తించిన వెంటనే సంబంధిత సోషల్ మీడియా సంస్థలు వాటిని తొలగించాల్సి ఉంటుంది. ఇది సినిమా పైరసీని అరికట్టడంతో పాటు ఇలాంటి దుష్ప్రచారాలను నిరోధించడానికి ఒక శక్తివంతమైన న్యాయ సాధనంగా ఉపయోగపడుతుంది.

ఇక‌, ఇవాళ ఉగాది కానుకగా ప్రేక్షకుల ముందుకు వచ్చిన ఈ చిత్రంలో పవన్ సరసన శ్రీలీల, రాశి ఖన్నా హీరోయిన్లుగా నటించగా, దేవి శ్రీ ప్రసాద్ సంగీతాన్ని సమకూర్చారు. తాజా కోర్టు ఉత్తర్వులతో సినిమాపై ఆన్‌లైన్‌లో జరిగే నెగెటివ్ ప్రచారానికి తాత్కాలికంగా ఫుల్‌స్టాప్ పడినట్లయింది.