సాఫ్ట్‌వేర్ ఇంజనీర్‌పై పెంపుడు కుక్క దాడి.. 50 కుట్లు!

గణతంత్ర దినోత్సవం రోజున బెంగళూరులో తెల్లవారుజామున 6:54 గంటల సమయంలో ఒక మహిళా సాఫ్ట్‌వేర్ ఇంజనీర్ తన నివాసం వద్ద మార్నింగ్ వాక్‌కు వెళ్లారు. అంతా ప్రశాంతంగా ఉందనుకుంటున్న సమయంలో, ఒక్కసారిగా ఓ పెంపుడు కుక్క ఆమెపైకి దూసుకొచ్చింది. నేరుగా మెడపై దాడి చేసి తీవ్రంగా గాయపరిచింది.

ఆమె అరుపులు విని ఒక వ్యక్తి వెంటనే స్పందించి కుక్కను లాగేందుకు ప్రయత్నించాడు. అయితే, అది అతడిపైనా దాడికి దిగింది. అత్యంత కష్టం మీద ఆ వ్యక్తి కుక్క మెడను గట్టిగా పట్టుకొని పక్కకు లాగడంతో, బాధితురాలు ప్రాణభయంతో తడబడుతూనే లేచి లోపలికి వెళ్లి గేటు వేసుకోగలిగింది.

ఈ దాడిలో బాధితురాలి ముఖం, చేతులు, కాళ్లపై లోతైన గాయాలయ్యాయి. వెంటనే ఆసుపత్రికి తరలించగా, వైద్యులు ఆమెకు 50కి పైగా కుట్లు వేశారు. పెంపుడు కుక్కను సరిగ్గా కట్టడి చేయకుండా వదిలేసిన యజమాని నిర్లక్ష్యం వల్లే ఈ ఘోరం జరిగిందని ఆమె భర్త పోలీసులకు ఫిర్యాదు చేశారు. దీనికి సంబంధించిన సీసీటీవీ విజువల్స్ ఇప్పుడు సోషల్ మీడియాలో వైరల్ అవుతున్నాయి. ఈ ఘటనపై బెంగళూరు మున్సిపల్ కార్పొరేషన్ స్పందించింది. ఆ కుక్కకు లైసెన్స్ ఉందో లేదో తనిఖీ చేస్తోంది. బాధ్యుడైన యజమానిపై కఠిన చర్యలు తీసుకునే అవకాశం ఉంది.