భారత విద్యార్థులకు కెనడా భారీ షాక్.. 80 శాతం వీసాల తిరస్కరణ!

విదేశాల్లో ఉన్నత విద్య అనగానే చాలా మందికి గుర్తొచ్చే దేశాల్లో కెనడా ఒకటి. అయితే, ఇప్పుడు ఆ దేశం భారత విద్యార్థులకు భారీ షాక్ ఇస్తోంది. ఈ ఏడాది భారత విద్యార్థులు చేసుకున్న స్టూడెంట్ వీసా దరఖాస్తుల్లో 80 శాతం వరకు తిరస్కరించారు. కెనడా ఇమ్మిగ్రేషన్, రెఫ్యూజీస్ అండ్ సిటిజన్‌షిప్ (ఐఆర్‌సీసీ) నివేదిక ప్రకారం గత పదేళ్లలో ఇంత భారీ స్థాయిలో వీసాలు తిరస్కరణకు గురవడం ఇదే మొదటిసారి.


భారతీయ విద్యార్థుల వీసాల తిరస్కరణ గణనీయంగా పెరగడంతో కెనడాలో కొత్తగా ప్రవేశాలు పొందుతున్న వారి సంఖ్య కూడా భారీగా తగ్గింది. 2024లో కేవలం 1.88 లక్షల మంది భారతీయ విద్యార్థులకు మాత్రమే కెనడాలో ప్రవేశాలు లభించాయి. రెండేళ్ల క్రితంతో పోలిస్తే ఈ సంఖ్య సగానికి పైగా పడిపోవడం గమనార్హం. ఒకప్పుడు 18 శాతం మంది విద్యార్థులు కెనడాను ఎంచుకుంటే ఇప్పుడు ఆ సంఖ్య 9 శాతానికి పడిపోయింది.

కఠినంగా మారిన నిబంధనలు
దేశంలో గృహాల కొరత, మౌలిక వసతులపై ఒత్తిడి, స్థానిక రాజకీయ కారణాల వల్ల కెనడా ప్రభుత్వం ఈ కఠిన నిర్ణయాలు తీసుకుంటోంది. వీసా కోసం విద్యార్థులు ఇప్పుడు మరింత పటిష్ఠమైన ఆర్థిక పత్రాలు, స్పష్టమైన స్టడీ ప్లాన్‌లు, లాంగ్వేజ్ టెస్ట్ ఫలితాలు సమర్పించాల్సి వస్తోంది. కనీస ఆర్థిక అవసరం రెట్టింపై 20,000 కెనడియన్ డాలర్లకన్నా ఎక్కువైంది. అంతేకాకుండా, చదువు తర్వాత ఉద్యోగ అవకాశాలను తగ్గించడం, కొన్ని వర్క్ పర్మిట్ నిబంధనలను కఠినతరం చేయడం వంటి చర్యలు చేపట్టింది. వేగవంతమైన వీసా ప్రక్రియ కోసం ఉద్దేశించిన ‘స్టూడెంట్ డైరెక్ట్ స్ట్రీమ్’ను కూడా నిలిపివేసింది.

 మారుతున్న ప్రాధాన్యం.. జర్మనీ వైపు చూపు 
కెనడా తలుపులు మూస్తుండటంతో భారత విద్యార్థులు ప్రత్యామ్నాయ మార్గాల వైపు చూస్తున్నారు. ఈ క్రమంలో వారికి కొత్త గమ్యస్థానంగా జర్మనీ మారింది. అప్‌గ్రాడ్ నివేదిక ప్రకారం 31 శాతం మంది భారత విద్యార్థులు ఇప్పుడు జర్మనీలో చదివేందుకు ఆసక్తి చూపుతున్నారు. జర్మనీలో నామమాత్రపు ఫీజులు లేదా ఉచిత విద్య, ఇంగ్లిష్‌లో బోధించే కోర్సుల సంఖ్య పెరగడం, బలమైన ఆర్థిక వ్యవస్థ, మెరుగైన ఉపాధి అవకాశాలు వంటివి విద్యార్థులను ఆకర్షిస్తున్నాయి. గత ఐదేళ్లలో జర్మనీలో భారత విద్యార్థుల సంఖ్య రెట్టింపై దాదాపు 60,000కు చేరినట్లు గణాంకాలు పేర్కొంటున్నాయి.