నొప్పితో ప్రాణం పోయినంత పనైంది.. అయినా ఓడిపోవడం బాధగా ఉంది: క్రిస్ వోక్స్

భారత జట్టుతో జరిగిన ఉత్కంఠభరితమైన చివరి టెస్టులో భుజం నొప్పితోనే మైదానంలోకి బ్యాటింగ్ చేయడానికి రావడం వెనుక ఉన్న కారణాలను ఇంగ్లండ్ ఫాస్ట్ బౌలర్ క్రిస్ వోక్స్ తాజాగా వెల్లడించాడు. జట్టు కోసం తాను చేసిన సాహసాన్ని, ఆ సమయంలో అనుభవించిన తీవ్రమైన నొప్పిని గుర్తుచేసుకున్నాడు. ఓవల్ మైదానంలో జరిగిన ఈ మ్యాచ్‌లో వోక్స్ చూపిన ధైర్యం క్రీడా చరిత్రలో చిరస్థాయిగా నిలిచిపోయింది.

ఐదో టెస్టు మొదటి రోజే ఫీల్డింగ్ చేస్తుండగా క్రిస్ వోక్స్ భుజానికి తీవ్ర గాయమైంది. దీంతో అతను మ్యాచ్ మొత్తానికి దూరమైనట్లు ప్రకటించారు. అయితే, ఆఖరి రోజు ఇంగ్లండ్ విజయానికి 35 పరుగులు అవసరమైన దశలో, చేతిలో నాలుగు వికెట్లు ఉన్నాయి. కానీ, భారత బౌలర్లు మహమ్మద్ సిరాజ్, ప్రసిధ్ కృష్ణ విజృంభించడంతో ఇంగ్లండ్ 9 వికెట్లు కోల్పోయి ఓటమి అంచున నిలిచింది. సరిగ్గా ఆ సమయంలో చేతికి స్లింగ్ తగిలించుకుని వోక్స్ బ్యాటింగ్‌కు రావడం అందరినీ ఆశ్చర్యపరిచింది.

ఆ క్షణాల గురించి వోక్స్ మాట్లాడుతూ, "ఆ మ్యాచ్‌లో మేము ఓడిపోవడం నన్ను తీవ్రంగా నిరాశపరిచింది. గెలిచి ఉంటే బాగుండేది. అయితే, జట్టు కష్టాల్లో ఉందప్పుడు. అందుకే, బ్యాటింగ్‌కు వెళ్లకూడదనే ఆలోచన నాకు ఒక్క క్షణం కూడా రాలేదు. ఒకవేళ 100 పరుగులు చేయాల్సి ఉన్నా నేను కచ్చితంగా బరిలోకి దిగేవాడిని. నా ధైర్యాన్ని చూసి కొందరు భారత ఆటగాళ్లు వచ్చి అభినందించడం సంతోషాన్నిచ్చింది. అయినా, నా స్థానంలో ఏ ఆటగాడు ఉన్నా ఇదే పని చేసేవాడు" అని తెలిపాడు.

గాయంతో పరుగులు తీయడం ఎంత కష్టంగా మారిందో వివరిస్తూ, "మొదటి పరుగు తీయడమే అత్యంత నరకంగా అనిపించింది. నొప్పిని తట్టుకోవడానికి కోడెయిన్ తీసుకున్నాను. అయినా చాలా బాధగా ఉంది. సహజంగానే చేయి కట్టుకుని ఉన్నా మామూలుగా పరిగెత్తేందుకు ప్రయత్నించాను. ఆ సమయంలో నా భుజం మళ్లీ ఊడిపోయిందేమోనని నిజంగా ఆందోళన చెందాను. అందుకే వెంటనే హెల్మెట్ తీసి, పంటితో గ్లోవ్ తొలగించి భుజాన్ని చెక్ చేసుకున్నాను" అని వోక్స్ ఆ భయానక అనుభవాన్ని పంచుకున్నాడు.

చివరికి ఆ మ్యాచ్‌లో ఇంగ్లండ్ ఆరు పరుగుల తేడాతో ఓటమిపాలైంది. అయినప్పటికీ, జట్టు కోసం వోక్స్ చూపిన తెగువ క్రీడాభిమానుల హృదయాలను గెలుచుకుంది.