నల్గొండ నుంచే పోటీ చేస్తా: కోమటి రెడ్డి వెంకటరెడ్డి

నాయకుడంటే స్వార్థం లేకుండా పాదయాత్ర చేసేవాడని... ఆయనే రాహుల్ గాంధీ అని కాంగ్రెస్ ఎంపీ కోమటిరెడ్డి వెంకటరెడ్డి కొనియాడారు. జూన్ మొదటి వారంలో భట్టి విక్రమార్క పాదయాత్ర నల్గొండకు చేరుకుంటుందని, ఆ సందర్భంగా భారీ సభను ఏర్పాటు చేస్తామని, ఆ సభకు ప్రియాంకాగాంధీ హాజరవుతారని చెప్పారు. ఈ నెల 28న నల్గొండలోని ఎంజీయూలో టీపీసీసీ అధ్యక్షుడు రేవంత్ రెడ్డి నిరుద్యోగ దీక్ష నిర్వహించబోతున్న సంగతి తనకు తెలియదని... ఈ ఉదయం ఆ దీక్ష గురించి తనకు ఉత్తమ్ కుమార్ రెడ్డి చెప్పారని తెలిపారు. వచ్చే ఎన్నికల్లో తాను నల్గొండ నియోజకవర్గం నుంచే పోటీ చేస్తానని చెప్పారు. తాను పోటీ చేస్తే ప్రజలు తప్పకుండా గెలిపిస్తారని ధీమా వ్యక్తం చేశారు.