మహేశ్ బాబు మూవీలో మోహన్ బాబు?

విలన్ గా .. హీరోగా మోహన్ బాబు సుదీర్ఘకాలం పాటు వెండితెరపై ఒక వెలుగు వెలిగారు. ఈ మధ్య కాలంలో ఆయన సినిమాల సంఖ్యను తగ్గించుకున్నారు. తనకి బాగా నచ్చితే కీలకమైన పాత్రలు చేయడానికి కూడా ఆయన ఓకే అనేస్తున్నారు. అలా ఆయన ఆ మధ్య 'మహానటి'లో ఎస్వీఆర్ గా చేశారు. అలాగే 'ఆకాశం నీ హద్దురా' సినిమాలోను కనిపించారు.

తాజాగా ఆయన త్రివిక్రమ్ సినిమాలో చేయనున్నట్టుగా ఒక టాక్ వినిపిస్తోంది. మహేశ్ బాబు హీరోగా త్రివిక్రమ్ ఒక సినిమా చేయనున్నాడు. ప్రస్తుతం మహేశ్ చేస్తున్న 'సర్కారువారి పాట' పూర్తి కాగానే, ఆయన ఈ సినిమా సెట్స్ పైకే వెళ్లనున్నాడు. ఈ సినిమాలో మహేశ్ కి మావయ్య క్యారెక్టర్ ఒకటి ఉందట.

ఆ పాత్రకి గల ప్రాధాన్యత కారణంగా ఆ పాత్రను మోహన్ బాబు చేస్తే బాగుంటుందనే ఉద్దేశంతో త్రివిక్రమ్ సంప్రదించినట్టుగా తెలుస్తోంది. పాత్ర పరమైన చర్చలు కూడా జరిగాయని చెబుతున్నారు. ఈ సినిమాలో మోహన్ బాబు నటించడం ఖాయమేనని అంటున్నారు. ఇక ఆయన హీరోగా చేసిన 'సన్నాఫ్ ఇండియా' త్వరలో ప్రేక్షకుల ముందుకు రానుంది.