‘నిహారికని చైతన్య చేతిలో పెడుతున్న ఈ శుభతరుణంలో..’ అంటూ ఫొటోలు పోస్ట్ చేసిన చిరు

సినీనటుడు నాగబాబు కుమార్తె నిహారిక కొణిదెల పెళ్లికి అన్ని ఏర్పాట్లు పూర్తయ్యాయి. జొన్నలగడ్డ వెంకట చైతన్యతో రేపు రాత్రి 7 గంటల 15 నిమిషాలకు ఆమె వివాహం జరగనున్న విషయం తెలిసిందే. రాజస్థాన్‌లోని ఉదయ్‌పూర్‌లో జరగనున్న ఈ పెళ్లి వేడుకలో పాల్గొనడానికి మెగా కుటుంబం తరలి వెళ్లింది. పెళ్లి నేపథ్యంలో మెగా ఫ్యామిలీ నిహారికతో దిగిన ఫొటోలు వైరల్ అవుతున్నాయి. తాజాగా, మెగాస్టార్ చిరంజీవి కూడా నిహారికతో కలిసి ఫొటో దిగి పోస్టు చేశారు.
            
తనతో చిన్నప్పుడు నిహారిక దిగిన ఫొటోలను కూడా ఆయన పోస్ట్ చేసి ఆసక్తికర వ్యాఖ్యలు చేశారు. ఆమెను ఎత్తుకుని ఆయన అప్పట్లో ఈ ఫొటో దిగారు. ‘మా చేతిలో పెరిగిన మా చిన్నారి నిహారికని, చైతన్య చేతిలో పెడుతున్న ఈ శుభతరుణంలో, ముందస్తుగా, కాబోయే  దంపతులకు నా శుభాకాంక్షలు, ఆశీస్సులు’ అని చిరు పేర్కొన్నారు.