ముందు రివ్యూలు చూస్తా... రేటింగ్ బాగుంటేనే సినిమా చూస్తా: నాగార్జున

టాలీవుడ్ కింగ్ నాగార్జున తాజాగా మీడియాతో మాట్లాడుతూ ఆసక్తికర వ్యాఖ్యలు చేశారు. ఓ సినిమాకు వచ్చే టాక్ పై రివ్యూల ప్రభావం ఉంటుందని అన్నారు. ప్రస్తుత ట్రెండ్ లో రివ్యూలు కూడా సినిమా ప్రచారంలో ప్రధాన భూమిక పోషిస్తున్నాయని తెలిపారు.

తాను కూడా రివ్యూలు చూసిన తర్వాతే సినిమాలు చూస్తానని స్పష్టం చేశారు. సినిమాలే కాదు, ఓ వెబ్ సిరీస్ చూడాలన్నా తాను ముందు రివ్యూలు చూస్తానని వెల్లడించారు. 

సినిమా గానీ, వెబ్ సిరీస్ గానీ రేటింగ్ బాగుంటేనే చూస్తానని పేర్కొన్నారు. 7 రేటింగ్ పాయింట్లు ఉంటేనే సినిమా చూస్తానని నాగ్ వివరించారు. లేకపోతే సమయం వృథా చేసుకోవాల్సి ఉంటుందని అభిప్రాయపడ్డారు. తాను రేటింగ్ ల కోసం ఐఎండీబీని ఫాలో అవుతానని వెల్లడించారు.

గతంలో సినిమా విడుదలైన వారం తర్వాత పత్రికల్లో రివ్యూలు వచ్చేవని, ఇప్పుడు సోషల్ మీడియా కారణంగా రివ్యూలకు గిరాకీ పెరిగిందని అన్నారు.